ແຂວງບໍລິຄໍາໄຊ ໄດ້ເປີດກອງປະຊຸມປະເມີນຜົນການຈັດຕັ້ງປະຕິບັດວຽກງານກໍ່ສ້າງຮາກຖານຈຸດສຸມເຂດໃຈກາງ ປະຈໍາປີ 2022 ຂຶ້ນຫວ່າງບໍ່ດົນຜ່ານມານີ້ ທີ່ຫ້ອງປະຊຸມເບີ 1 ກອງບັນຊາການ ປກສ ແຂວງ ໂດຍການເປັນປະທານຂອງ ທ່ານ ກອງແກ້ວ ໄຊສົງຄາມ ກໍາມະການສູນກາງພັກ ເລຂາພັກແຂວງ ເຈົ້າແຂວງບໍລິຄໍາໄຊ ປະທານປ້ອງກັນຊາດ-ປ້ອງກັນຄວາມສະຫົງບແຂວງ, ເປັນກຽດເຂົ້າຮ່ວມໂດຍ ທ່ານ ພົນໂທ ກົງທອງ ພົງວິຈິດ ກໍາມະການສູນກາງພັກ ຮອງເລຂາຄະນະພັກກະຊວງ ຮອງລັດຖະມົນຕີກະຊວງປ້ອງກັນຄວາມສະຫົງບ, ມີການນໍາກະຊວງ ປກສ, ການນໍາຂັ້ນແຂວງ, ກອງບັນຊາການທະຫານແຂວງ, ກອງບັນຊາການ ປກສ ແຂວງ, ບັນດາທ່ານເຈົ້າເມືອງ 7 ເມືອງ, ກອງບັນຊາການ ປກສ 7 ເມືອງ, ພະນັກງານກໍ່ສ້າງຮາກຖານ 916, ເລຂາພັກບ້ານ-ນາຍບ້ານທີ່ກ່ຽວຂ້ອງເຂົ້າຮ່ວມ.
ທ່ານ ພັນໂທ ເຄນວອນ ລໍວັນໄຊ ຄະນະພັກ ຮອງຫົວໜ້າກອງບັນຊາການ ປກສ ແຂວງ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດປະເມີນຜົນວຽກງານ ກໍ່ສ້າງຮາກຖານຈຸດສຸມເຂດໃຈກາງແຂວງບໍລິຄໍາໄຊ ປະຈໍາປີ 2022 ຜ່ານການຈັດຕັ້ງປະຕິບັດວຽກງານຕິດຕາມ, ກວດກາ ແລະ ປະເມີນຜົນຢູ່ 11 ບ້ານຫຼໍ່ແຫຼມ ພາຍໃນ 4 ເມືອງ ເຫັນວ່າອໍານາດການປົກຄອງບ້ານມີຄວາມເຂັ້ມແຂງ, ບ້ານມີຄວາມສະຫົງບທາງດ້ານການເມືອງ ແລະ ມີຄວາມເປັນລະບຽບຮຽບຮ້ອຍປອດໄພທາງສັງຄົມ, ບັນດາກໍລະນີທີ່ເກີດຂຶ້ນພາຍໃນບ້ານຫຼຸດລົງຫຼາຍກ່ວາເຄິ່ງໜຶ່ງ, ບ້ານໄດ້ຮັບການຢັ້ງຢືນເປັນບ້ານປ້ອງກັນຄວາມສະຫງົບດີ ແລະ ເປັນບ້ານປອດຄະດີ, ອໍານາດການປົກຄອງ, ການຈັດຕັ້ງທີ່ກ່ຽວຂ້ອງ, ປະຊາຊົນພາຍໃນບ້ານຮັບຮູ້, ເຂົ້າໃຈຕໍ່ແນວທາງຂອງພັກ-ລະບຽບກົດໝາຍຂອງລັດ ປະກອບສ່ວນເຂົ້າໃນວຽກງານຮາກຖານ 025 ຢ່າງເລິກເຊິ່ງ ກວ້າງຂວາງ, ຜ່ານການປະເມີນຜົນສາມາດເກັບກໍາຂຶ້ນບັນຊີເປົ້າໝາຍຕ່າງໆໄດ້ທັງໝົດ 1.670 ຄົນ ຍິງ 472 ຄົນ, ໄດ້ຮັບການແກ້ໄຂສໍາເລັດ 1.134 ຄົນ ຍິງ 57 ຄົນ, ໃນນີ້ ພົວພັນຢາເສບຕິດ 776 ຄົນ ຍິງ 39 ຄົນ, ດື້ດ້ານບໍ່ຟັງຄວາມການຈັດຕັ້ງ 153 ຄົນ ຍິງ 13 ຄົນ, ນັກເລງອັນຕະພານ, ກໍ່ອາລະວາດຕີກັນ 36 ຄົນ, ຍົກຍ້າຍຖິ່ນຖານ, ຕັ້ງພູມລໍາເນົາບໍ່ຖືກຕ້ອງ 267 ຄອບຄົວ, ຕັ້ງສະນໍາໃນເຂດຫວງຫ້າມ 162 ຄອບຄົວ, ມີອາວຸດເຖື່ອນ 155 ຄົນ, ຄ້າຂາຍເຖື່ອນ 61 ຄົນ, ຂີ້ລັກງັດແງະ 35 ຄົນ, ຂັດແຍ່ງທີ່ດິນ 16 ຄອບຄົວ, ຂັດຂວາງການປະຕິບັດງານຂອງເຈົ້າໜ້າທີ່ 6 ຄົນ, ຢຶດຂອງກາງໄດ້ຢາບ້າ 4.794 ເມັດ, ຄັນຊາອັດແທ່ງ 200 ກິໂລ, ລົດກະບະ 1 ຄັນ, ລົດຈັກ 1 ຄັນ, ປືນແກັບແຕ່ງ 1 ກະບອກ, ເຫຼັກງັດ 2 ອັນ, ມີດ 3 ດວງ, ຢາໄອ້ 1 ຫຼອດ, ຈາກຜົນການຈັດຕັ້ງປະຕິບັດການປະເມີນຄືດັ່ງກ່າວ ສາມາດປົດ ຈໍານວນ 6 ບ້ານອອກຈາກບ້ານຫຼໍ່ແຫຼມ ແລະ 1 ເມືອງ ອອກຈາກເມືອງຫຼໍ່ແຫຼມໄດ້ຢ່າງສົມບູນ. ພ້ອມນີ້ຍັງໄດ້ຜ່ານທິດທາງແຜນການໃນຕໍ່ໜ້າ.
ຕອນທ້າຍ ທ່ານ ພົນໂທ ກົງທອງ ພົງວິຈິດ, ທ່ານ ກອງແກ້ວ ໄຊສົງຄາມ ໄດ້ຜັດປ່ຽນກັນມີຄໍາເຫັນໂອ້ລົມ ແລະ ໃຫ້ທິດຊີ້ນໍາ ຊຶ່ງໄດ້ກ່າວສະແດງຄໍາຍ້ອງຍໍຊົມເຊີຍຕໍ່ຜົນສໍາເລັດທີ່ຍາດມາໄດ້ ແລະ ໄດ້ເນັ້ນໜັກໃຫ້ທຸກພາກສ່ວນຈົ່ງພ້ອມກັນສືບຕໍ່ເຮັດວຽກງານກໍ່ສ້າງຮາກຖານການເມືອງຈຸດສຸມເຂດໃຈກາງຂອງແຂວງ ໂດຍຕິດພັນກັບວຽກງານສາມສ້າງ ທີ່ກົມການເມືອງສູນກາງພັກວາງອອກ, ຄຽງຄູ່ກັບການຈັດຕັ້ງປະຕິບັດ 2 ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ແລະ ການແກ້ໄຂບັນຫາຢາເສບຕິດ, ກໍຄື 9 ຫົວຂໍ້ສໍາມະນາວິທະຍາສາດ, ການແກ້ໄຂບັນຫາ 4 ເຖື່ອນຂອງແຂວງໃຫ້ມີປະສິດທິຜົນສູງ, ສືບຕໍ່ຕິດຕາມ, ກວດກາ, ແກ້ໄຂ ແລະ ປະເມີນຜົນ ຈໍານວນ 5 ບ້ານໃນ 3 ເມືອງທີ່ຍັງບໍ່ທັນປົດອອກຈາກບ້ານຫຼໍ່ແຫຼມໃຫ້ສໍາເລັດຕາມແຜນການທີ່ກໍານົດໄວ້.
ໃນໂອກາດດຽວກັນ ທ່ານ ພົນໂທ ກົງທອງ ພົງວິຈິດ ຍັງໄດ້ມອບເງິນ ຈໍານວນ 30 ລ້ານກີບໃຫ້ແກ່ກອງບັນຊາການ ປກສ ແຂວງບໍລິຄໍາໄຊ ເພື່ອນໍາໃຊ້ເຂົ້າໃນວຽກງານວິຊາສະເພາະດ້ານຕ່າງໆ.
(ຂ່າວ-ພາບ: ອ່ອນຈັນ)
